რაში გვეხმარება CRM სისტემის დანერგვა კომპანიაში

დღითი დღე სულ უფრო მოთხოვნადი ხდება CRM(Customer Relationship Management) სისტემები კომპანიებში. ამ დრომდე ბიზნესებს ჯერ კიდევ არ ჰქონდათ ნათლად გააზრებული მომხმარებელთან ურთიერთობის მენეჯმენტ სისტემების მნიშვნელობა ბიზნესის წარმატებაში, თუმცა გაყიდვებსა და მარკეტინგში სხვადასხვა ხელსაწყოების გამოყენება და მომხმარებელთან უფრო ახლო კომუნიკაცია სულ უფრო მნიშვნელოვანი ხდება კომპანიებისთვის, შესაბამისად, იზრდება მოთხოვნა ამ მიმართულებით ცოდნის ამაღლების კუთხითაც.

ბლოგში CRM სისტემების რამდენიმე მნიშვნელოვან უპირატესობაზე გავამახვილებთ ყურადღებას.

1. მომხმარებელთან უკეთესი კომუნიკაცია

თანამედროვე, დინამიურ სამყაროში, როდესაც ბიზნესის მხრიდან ჩვენს გარშემო უამრავი შეთავაზება მოდის, საკმაოდ რთულია არჩევანის გაკეთება. ამ ყველაფერს უამრავი დრო და რესურსი სჭირდება. ამიტომ, პროფესიონალები უკვე საუბრობენ იმაზე, რომ დღეს გაყიდვები აღარ არის B2C(Business to Customer), ან B2B(Business to Business), არამედ H2H(Human to Human), რაც იმას ნიშნავს, რომ ადამიანებთან ინდივიდუალური მიდგომა, პერსონალური ურთიერთობები უზარმაზარ გავლენას ახდენს, რომ მათ სწორედ თქვენი პროდუქტი/მომსახურება აირჩიონ და არა კონკურენტის. CRM სისტემა კი, სწორედ, იმ ინფორმაციის ასე ვთქვათ საცავია, რაც გულისხმობს მომხმარებლის ვინაობას, მათ ქცევას, სურვილებს, ხასიათს და ა.შ შედეგად თქვენ შეგიძლიათ თითოეულ მომხმარებელს სწორ დროს, სწორედ ის პროდუქტი/მომსახურება შესთავაზოთ, რაც მათ იმ მომენტში სჭირდებათ და სურთ.

2. გაუმჯობესებული მომსახურება

კომპანიები, რომელთაც CRM სისტემა აქვთ დანერგილი, მომხმარებლებს გაცილებით უკეთეს სამომხმარებლო გამოცდილებას სთავაზობენ, ვიდრე მათ გარეშე. როგორც ზევით უკვე ვახსენეთ, პროგრამა ინახავს თითოეული მომხმარებლის სრულ ისტორიას, შესაბამისად, ყველა ჯერზე, როდესაც ეს ადამიანი თქვენთან ბრუნდება, უკვეთავს პროდუქტს/სერვისს, ან თქვენი მხრიდან რაიმე ტიპის მხარდაჭერა სჭირდება, მასთან საუბრის მომენტშივე გაქვთ სრული წინარე ისტორია, რაც საშუალებას გაძლევთ ყველა მომხმარებელს ისე ესაუბროთ, როგორც დიდი ხნის ნაცნობს, შესაბამისად ეს ზოგავს თქვენს რესურსს, ხოლო მომხმარებელს დადებითად განაწყობს თქვენდამი, რადგან თავს დაფასებულად გრძნობს. სტატისტიკის მიხედვით, ახალი მომხმარებლის შეძენა 25-ჯერ უფრო ძვირი ჯდება, ვიდრე არსებულის შენარჩუნება. აღნიშნული მაჩვენებელი ხაზს უსვამს არა მხოლოდ ახალი მომხმარებლების შეძენის, არამედ არსებულ მომხმარებლებთან მჭიდრო და გრძელვადიანი ურთიერთობების დამყარებას მნიშვნელობას.

3. გაყიდვების ზრდა

Epsilon-ის მიერ ჩატარებული კვლევის მიხედვით, მომხმარებელთა 80%-ში იზრდება ალბათობა იმისა, რომ პროდუქტს/მომსახურებას იყიდის, მაშინ როდესაც ბრენდები პერსონიფიცირებულ გამოცდილებას სთავაზობენ. გარდა ამისა, CRM სისტემები მნიშვნელოვნად ამარტივებს თვითონ გაყიდვების პროცესს. პროგრამები საშუალებას იძლევა მოახდინოთ თქვენი მომხმარებლების შესახებ სრული ინფორმაციის ავტომატიზება და ის თქვენს სასარგებლოდ დაამუშაოთ, მაგალითად შექმნათ აუდიტორიები და მათ გაუგზავნოთ პერსონალური შეთავაზებები იმის მიხედვით, რა პროდუქტია მათთვის საინტერესო, რა ინტენსივობით ახორციელებენ შეკვეთას, აწარმოოთ ე.წ “Cross Sale” იმაზე დაყრდნობით, თუ რა პროდუქტის/მომსახურების შეკვეთასაც აკეთებენ ყველაზე ხშირად, შესთავაზოთ სხვა, ასევე შესაძლო საინტერესო პროდუქტი/მომსახურება. ეს ყველაფერი ზოგავს გაყიდვების გუნდის დროსა და ძალისხმევას, ამავდროულად ზრდის კონვერსიას.

3. მონაცემების გაუმჯობესებული მენეჯმენტი და ანალიტიკა

როგორც ზევით უკვე ვახსენეთ, CRM სისტემები ინახავს მომხმარებელთა შესახებ სრულ ინფორმაციას, ეს კი, კომპანიებს ეხმარება ჰქონდეთ მომხმარებელთა ქცევის შესახებ დეტალური და სრული ინფორმაცია. საჭირო ინფორმაციაზე ხელმისაწვდომობა ამარტივებს მონაცემებზე დამყარებული გადაწყვეტილებების მიღებას, სწორი სტრატეგიების დაგეგმვას, შესაძლებლობებისა და გამოწვევების დროულ იდენტიფიცირებას, რაც ბიზნესის წარმატების უპირობო გარანტია. მაგალითისთვის, Starbucks აპლიკაციის დახმარებით, თვალს ადევნებს მომხმარებლის შესყიდვებს და პრეფერენციებს, რათა პერსონალური შეთავაზებები აწარმოოს. პირობითად, თუ მომხმარებელი ხშირად ყიდულობს ლატეს, მათ შეიძლება მიიღონ ფასდაკლება ლატეს შემდეგ შეძენაზე ან პირიქით, რეკომენდაცია ახალი გემოს შესახებ, რომელიც შესაძლოა ლატესმოყვარულს მოეწონოს. მსგავსი ტიპის პერსონალური შეთავაზებები ასტიმულირებს განმეორებით შესყიდვებს და ზრდის მომხმარებელთა ჩართულობას ბრენდთან.

5. კონკურენტული უპირატესობა

რამდენად უცნაურადაც არ უნდა მოგეჩვენოთ, კომპანიაში CRM სისტემის დანერგვა, კონკურენტული უპირატესობის მოსაპოვებლად ერთ-ერთი მნიშვნელოვანი წინგადადგმული ნაბიჯია. ამ დროს თქვენ ხელთ გაქვთ მომხმარებლების შესახებ სრული ინფორმაცია, მათი გაანალიზებით და სისტემის ერთხელ გამართვით, შესაძლებლობა გეძლევათ როგორც ადამიანური, ასევე ფინანსური რესურსი დაზოგოთ, შედეგად კი, გაცილებით სწორი ბიზნეს გადაწყვეტილებები მიიღოთ, გაზარდოთ გაყიდვები, არსებული მომხმარებლები შეინარჩუნოთ ხანგრძლივი დროით და მათ საუკეთესო სამომხმარებლო გამოცდილება შესთავაზოთ, რაც საბოლოო ჯამში მომხმარებელთან გრძელვადიანი, მომგებიანი ურთიერთობის დამყარების გარანტია.